ភ្នំពេញ៖ ប្រធានាធិបតីអាមេរិក លោក ចូ បៃឌិន បានបញ្ជាក់ថា សហរដ្ឋអាមេរិកនៅតែប្ដេជ្ញាជួយដល់កម្ពុជាបន្ថែមទៀតធ្វើឱ្យប្រទេសនេះកាន់តែរីកចម្រើន ប្រជាធិបតេយ្យ និងឯករាជ្យ។

លោក ចូ បៃឌិន បានសរសេរនៅលើទំព័រ Twitter របស់លោកកាលពីម្សិលមិញក្នុងពេលដែលលោកមកកម្ពុជាដើម្បីចូលរួមប្រជុំអាស៊ាន។

លោកបានសរសេរថា៖ «ខ្ញុំបានជួបជាមួយនាយករដ្ឋមន្ត្រីកម្ពុជាដើម្បីពិភាក្សាអំពីការដឹកនាំអាំស៊ានរបស់កម្ពុជាក្នុងឆ្នាំដែលមានការប្រឈមនេះ។ ខ្ញុំក៏បានរំលឹកឡើងវិញនូវការប្តេជ្ញាចិត្តរបស់សហរដ្ឋអាមេរិកចំពោះប្រជាជនកម្ពុជា និងបំណងប្រាថ្នារបស់ពួកគេសម្រាប់ប្រទេសដែលមានភាពរីកចម្រើន ប្រជាធិបតេយ្យ និងឯករាជ្យបន្ថែមទៀត»។

គួរឱ្យដឹងផងដែរថាប្រធានាធិបតីអាមេរិកបានដឹកនាំប្រតិភូមកចូលរួមកិច្ចប្រជុំកំពូលអាស៊ាន និងកិច្ចប្រជុំកំពូលពាក់ព័ន្ធពីថ្ងៃទី១២ ខែវិច្ឆិកាកន្លងទៅ។ ក្នុងឱកាសនៃការមកចូលរួមកិច្ចប្រជុំនេះលោកក៏មានជំនួបដាច់ដោយឡែកជាមួយនាយករដ្ឋមន្ត្រីកម្ពុជា សម្ដេចតេជោ ហ៊ុន សែន ផងដែរ៕